Páfagaukar geta margir hverjir talað. Þeir vita auðvitað ekki hvað þeir segja en þeir geta hermt eftir orðum og setningum. Það dugði lögreglunni í Michigan í Bandaríkjunum til að fá svar við hvað hafði gerst á morðvettvangi. Þetta gerðist fyrir nokkrum árum. Samkvæmt frétt CBC þá fannst 46 ára karlmaður, Martin, látinn. Hann hafði verið skotinn fimm sinnum. Á vettvangi var eiginkona hans, Glenna, og var hún með skotsár á höfði.
Martin átti páfagauk, Bud, og var honum komið fyrir hjá fyrrum eiginkonu hans, Christina, eftir morðið.
Bud er mjög málglaður og tveimur vikum eftir að hann flutti inn til Christina byrjaði hann að segja undarlega hluti.
CBC segir að „samtöl“ hans hafi endað með orðunum „Don´t fucking shoot“. Þetta endurtók hann og hermdi um leið eftir rödd Martin.
Hrollur fór um Christina þegar hún heyrði páfagaukinn tala. Hún var fljót til og tók orð hans upp. Hún sagði að hann hafi einnig talað með sitt hvorri röddinni þegar hann hélt uppi samtali.
„Að heyra þetta tveggja mínútna „samtal“ og þekkja Marty og Glenna og vita hvernig þau töluðu við hvort annað var hræðilegt,“ sagði Christina.
Saksóknarar íhuguðu að nota orð páfagauksins í málinu en féllu frá því þar sem ólíklegt þótti að orð hans myndu fá mikið vægi í málinu.
Niðurstaða málsins var að Glenna hafði skotið Martin og síðan reynt að taka eigið líf.
