-5 C
Grindavik
3. desember, 2020

Mæðgur gleyptu tæpt hálft kíló af kókaíni

Skyldulesning

Héraðsdómur Reykjaness dæmdi í gær mæðgur í átta mánaða fangelsi fyrir tilraun til smygls á kókaíni. Konurnar voru handteknar á Keflavíkurflugvelli þann 2. ágúst er þær voru nýlentar frá Brussel í Belgíu. Eitthvað hefur vakið grunsemdir Tollgæslu, því konurnar voru teknar í skoðun á flugvellinum sem leiddi til þess að 408 grömm af kókaíni fundust í sex hylkjum sem þær földu innvortis.

Segir í dómnum að konurnar hafi játað undanbragðalaust að hafa flutt til landsins umrædd fíkniefni og að þau hafi verið ætluð til söludreifingar. DV sagði frá því í ágúst þegar konurnar hafi verið handteknar og úrskurðaðar í gæsluvarðhald og kemur það gæsluvarðhald til frádráttar átta mánaða fangelsisdómnum.

Við ákvörðun refsingar var litið til þess að konurnar væru ekki eigendur fíkniefnanna, heldur hafi þær tekið að sér að flytja það til landsins gegn þóknun. Eins var litið til þess að þær hafi játað greiðlega sakargiftir fyrir dómi.

Innlendar Fréttir