Meta næstu skref í björguninni

0
125

Stórflutningaskipið, Wilson Skaw, strandaði á Húnaflóa í dag. Ljósmynd/Landhelgisgæslan

„Þyrlan er komin á staðinn og verið er að meta aðstæður á vettvangi, skoða hvort hugsanlega sé mengun til staðar á svæðinu og svo framvegis. Síðan verður varðskipið Freyja komið þarna um kvöldmatarleytið.“

Þetta segir Ásgeir Erlendsson, upplýsingafulltrúi Landhelgisgæslunnar en norska stórflutningaskipið, Wilson Skaw, strandaði við Enn­is­höfða á Húna­flóa á leið sinni frá Hvammstanga til Hólma­vík­ur í dag.

Engar upplýsingar um skemmdir eða leka Hann segir fara vel um skipverja en að næstu klukkustundir komi til með að fara í að meta hver næstu skref í björguninni verða.

„Við höfum ekki fengið neinar upplýsingar um skemmdir eða að leki sé kominn að skipinu en eins og ég segi, þá er verið að meta það í þessum töluðu orðum,“ segir Ásgeir.

Land­helg­is­gæsl­an hef­ur gert Um­hverf­is­stofn­un viðvart um strandið.

Varðskipið Freyja verður komið á strandstað um kvöldmatarleytið. mbl.is/Hafþór Hreiðarsson

Ekki sjáanleg mengun eins og er Sigrún Ágústsdóttir, forstjóri Umhverfisstofnunar, segir að stofnunin sé í startholunum. Hún segir að vettvangsstjóri Umhverfisstofnunar vinni nú með Landhelgisgæslunni.

„Það er ekki sjáanleg mengun eins og er en ef aðstæður versna þá förum við í aðgerðarstjórnun og þá tekur annað viðbragðsstig við.“

Fyrsta viðbragð björgun mannslífa Sigrún segir fyrsta viðbragð í svona málum náttúrulega vera björgun mannslífa og vonar að það sé hægt að losa skipið af strandstað.

„Síðast þegar við vorum í svona strandverkefni hér fyrir sunnan leysti [varðskipið] Freyja það vel af hólmi, sem var glæsilegt, og nú vonar maður það sama eða að það losni af sjálfsdáðum,“ segir Sigrún og heldur áfram.

„Svo þarf að fara yfir hvers lags olía er í skipinu, hversu mikil og hvernig aðstæður eru í náttúrunni í kring.“

Uppfært klukkan 16.35:

Myndskeið frá áhöfn Landhelgisgæslunnar:

Uppfært klukkan 22.47:

Í fréttaflutningi af málinu í dag var stórflutningaskipið, Wilson Skaw, fyrir misskilning sagt vera áburðarflutningaskip. Hið rétta er að skipið er stórflutningaskip sem í þessari siglingu var að flytja salt á milli hafna. Það hefur nú verið leiðrétt.

Ásgeir Erlendsson, upplýsingafulltrúi Landghelgisgæslunnar, segir fara vel um skipverja en að næstu klukkustundir komi til með að fara í að meta hver næstu skref í björguninni verða. Ljósmynd/Landhelgisgæslan

Land­helg­is­gæsl­an hef­ur gert Um­hverf­is­stofn­un viðvart um strandið en ekki fengið neinar upplýsingar um skemmdir eða að leki sé kominn að skipinu. Ljósmynd/Landhelgisgæslan