10.2 C
Grindavik
24. júní, 2021

Ný rannsókn – Miklu hærri dánartíðni af völdum COVID-19 en af inflúensu

Skyldulesning

Ný frönsk rannsókn, sem rúmlega 135.000 kórónuveirusjúklingar og inflúensusjúklingar tóku þátt í, sýnir að miklu fleiri látast af völdum kórónuveirunnar en inflúensu. Rannsóknin byggist á opinberum gögnum frá Frakklandi og sýnir svart á hvítu hversu alvarlegur COVID-19 sjúkdómurinn er.

Niðurstöður rannsóknarinnar hafa verið birtar í tímaritinu The Lancet Respiratory Medicine. Samkvæmt þeim þá er kórónuveiran næstum því þrisvar sinnum banvænni en inflúensa.

Vísindamennirnir báru saman gögn 89.530 sjúklinga, sem voru lagðir inn á sjúkrahús, vegna COVID-19 smits, í mars og apríl og gögn 45.819 sjúklinga sem voru lagðir inn með hefðbundna inflúensu frá desember 2018 fram í lok febrúar 2019.

Um 16,9% af COVID-19 sjúklingunum létust á tímabilinu en þá reið fyrsta bylgja heimsfaraldursins yfir Evrópu og læknar höfðu ekki yfir mörgum meðferðarúrræðum að ráða fyrir alvarlega veikt fólk. Dánartíðnin af völdum inflúensunnar var 5,8%. Jótlandspósturinn skýrir frá þessu.

Catherine Quantin, prófessor við háskólasjúkrahúsið í Dijon og hjá frönsku heilbrigðisstofnuninni Inserm, tók þátt í gerð rannsóknarinnar og segir hún að munurinn á dánartíðninni sé „sérstaklega sláandi“ af því að inflúensufaraldurinn 2018/2019 var sá versti í fimm ár í Frakklandi og fjöldi látinna sá mesti í fimm ár.

Vísindamennirnir telja að muninn á fjölda innlagna megi að hluta skýra með að ákveðið ónæmi gegn inflúensu sé til staðar. Það geti verið vegna fyrri sýkingar eða bólusetningar. Þeir komust einnig að þeirri niðurstöðu að fleiri COVID-19 sjúklingar þurfi á gjörgæslumeðferð að halda eða 16,3% á móti 10,8% hjá inflúensusjúklingunum. Einnig er legutíminn á gjörgæsludeild að meðaltali 15 dagar hjá COVID-19 sjúklingum en 8 dagar hjá inflúensusjúklingum.

spot_img
spot_img
spot_img

Innlendar Fréttir