8 C
Grindavik
15. apríl, 2021

Ný Stjörnustríðsmynd verður frumsýnd 2023

Skyldulesning

Walt Disney samsteypan tilkynnti í gær að ný Stjörnustríðsmynd verði frumsýnd um jólin 2023 ef allt gengur upp. Myndin hefur fengið titilinn Rogue Squadron og það er bandaríski leikstjórinn Patty Jenkins sem mun leikstýra henni. Hún er ekki nýgræðingur í leikstjórn og leikstýrði meðal annars Wonder Woman.

Samkvæmt frétt Indiewire þá kemur fram í tilkynningu frá Lucasfilm, sem er í eigu Disney, að í nýju myndinni verði kynnt til sögunnar ný kynslóð flugmanna orustugeimfara og að hinir frægu Jediar muni ekki koma við sögu.

En nýja myndin var ekki eina trompið sem Disney spilaði út í gær. Á fundi með fjárfestum var einnig kynnt að fyrirhugað sé að bæta enn við bæði Marvel- og Stjörnustríðsheimana á efnisveitunni Disney+.

Á næstu árum verða tíu nýjar þáttaraðir sýndar í Stjörnustríðsflokknum og það sama á við um Marvel. Þar á meðal verða tvær hliðarseríur af The Mandalorian. Einnig mun Disney taka 15 Disney- og Pixarmyndir til sýninga á Disney+ auk 15 þáttaraða.

Disney+ er nú með 87 milljónir áskrifenda og hefur fyrirtækið næstum náð því markmiði sem það setti sér um fjölda áskrifenda 2024.

Innlendar Fréttir