Nýr Cleopatra 36 til Noregs

0
90

Trefjar ehf. hefur afhent nýjan Cleopatra 36 til Noregs. Báturinn mun hefja veiðar á næstu dögum. Ljósmynd/Trefjar

Bátasmiðjan Trefjar ehf. í Hafnarfirði hefur afhent norska útgerðarmanninnum Tom Egil Hansen nýjan Cleopatra 36 bát. Báturinn hefur fengið nafnið Maya og mun Tom Egil sjálfur vera skipstjóri um borð, en Maya er þegar komin til Noregs og mun hefja veiðar á næstu dögum

Fram kemur í tilkynningu frá Trefjum að Maya er 10,99 metrar að lengd, mælist 11 bruttótonn og útbúin til línu- og netaveiða. Borðsalurinn er stór og fullbúin eldunaraðstaða er í brúnni.  Svefnpláss er fyrir þrjá í lúkar.  Salerni með sturtu. Lest bátsins rúmar fimmtán 380 lítra fiskikör.

Aðalvél bátsins er af gerðinni Scania D9 350 hestöfl tengd ZF286IV gír og er báturinn einnig útbúinn vökvadrifnum hliðarskrúfum að framan og aftan sem tengdar eru sjálfstýringu bátsins. Um borð eru siglingatæki af gerðinni Furuno, Olex og Simrad.

Lífbátur og annar öryggisbúnaður bátsins er frá Viking.