Alþjóðaheilbrigðismálastofnunin (WHO) er sögð fylgjast grannt með nýju afbrigði kórónuveirunnar, XBB.1.16, sem fengið hefur viðurnefnið Arktúrus. Fjöldi tilfella hefur greinst í Indlandi að undanförnu.
Breska ríkisútvarpið greindi frá því á mánudag að um sé að ræða undirafbrigði ómíkrón-afbrigðisins sem olli talsverðum usla veturinn 2021 til 2022.
COVID-tilfellum hefur farið fækkandi á heimsvísu undanfarna mánuði, en undanfarnar vikur hefur þeim aftur fjölgað á Indlandi og eru heilbrigðisyfirvöld sögð fylgjast grannt með gangi mála, meðal annars með tilliti til getu sjúkrahúsa til að taka á móti sjúklingum..
Á sunnudag greindust sex þúsund ný tilfelli í Indlandi og voru virk smit þá 35 þúsund. Í dag eru virk smit komin yfir 40 þúsund.
Ekki er talið að þetta afbrigði sé hættulegra en önnur afbrigði veirunnar en hæfileiki þess til að dreifa sér virðist aftur á móti mikill.
Vegna aukinnar útbreiðslu hefur grímuskyldu verið komið á í nokkrum héröðum Indlands en um ár er síðan grímuskylda var síðast í gildi á umræddum svæðum.
Hér að neðan má sjá graf sem sýnir fjölgun smita á Indlandi undanfarna mánuði:
