3 C
Grindavik
1. desember, 2020

Óbreytt skólastarf framhaldsskóla þrátt fyrir breytingar á reglugerð um smitvarnir

Skyldulesning

Á miðvikudaginn tekur ný reglugerð um smitvarnir vegna kórónuveirunnar gildi. Þessi breyting mun litlu breyta um starf framhaldsskóla þar sem áfangakerfi er notað en einhverjar breytingar verða í skólum sem notast við bekkjakerfi.

Morgunblaðið skýrir frá þessu í dag. Haft er eftir Steini Jóhannssyni, rektor Menntaskólans við Hamrahlíð, að þar verði skólastarfið að mestu óbreytt frá því sem verið hefur undanfarnar vikur. „Að meiri tilslakanir séu ekki gerðar um fjöldatakmarkanir og blöndun í framhaldsskólum eru mér vonbrigði. Það gekk mjög vel á sínum tíma þrátt fyrir blöndun nemendahópa í áfangaskólanum, enda hefur verið farið eftir bókinni um sóttvarnaráðstafanir,“ er haft eftir honum.

Samkvæmt breytingum á reglugerðinni þá mega 25 manns koma saman í stað 10 eins og verið hefur að undanförnu. En fólk í stærri hópum má ekki blandast saman og það kemur í veg fyrir að hægt sé að kenna á nýjan leik í áföngum þar sem nemendur, sem koma sitt úr hverri áttinni, eru saman. Haft er eftir Steini að annarprófin muni fara fram á netinu og hefjist í lok nóvember.

Einar Hreinsson, rektor Menntaskólans í Reykjavík, sagðist ekki búast við miklum breytingum þar því húsakynni skólans séu það þröng að nánast sé útilokað að framfylgja tveggja metra reglunni. Einnig séu aðeins tvær vikur í að próf hefjist.

Hjá Menntaskólanum á Akureyri er verið að leita leiða til að nemendur geti lokið önninni á „jákvæðan hátt“ eins og Jón Már Héðinsson, skólameistari, sagði í samtali við Morgunblaðið. Bekkjakerfið, sem þar er notað, vinni með þessu því nemendur séu í litlum afmörkuðum hópum. Hann sagði að reynt verði að ná sem flestum nemendum í hús á næstunni og verði þá farið yfir námsefni annarinnar.

Innlendar Fréttir