-2 C
Grindavik
25. janúar, 2021

Ölvaður maður veittist að starfsfólki – Innbrotsþjófur rekinn á flótta

Skyldulesning

Á áttunda tímanum í gærkvöldi var óskað eftir aðstoð lögreglunnar í verslun í vesturbæ Reykjavíkur. Þar hafði ölvaður og æstur maður veist að starfsfólki. Hann var handtekinn og vistaður í fangageymslu. Í ljós kom að hann hafði einnig stolið vörum úr versluninni. Á tíunda tímanum í gærkvöldi var maður handtekinn eftir að hann skemmdi hraðbanka í miðborginni. Hann var vistaður í fangageymslu.

Um klukkan fjögur í nótt var reynt að brjótast inn í hús í Bústaðahverfi. Reyndi gerandinn að komast inn um glugga en húsráðandinn hrakti hann á flótta og elti hann en missti af honum. Gerandinn hafði í hótunum við húsráðanda.

Skömmu fyrir klukkan fimm í nótt var tilkynnt um innbrot í verslun í miðborginni. Frekari upplýsingar lágu ekki fyrir þegar þetta er skrifað.

Tveir ökumenn voru handteknir í nótt, grunaðir um að vera undir áhrifum fíkniefna. Annar þeirra á átjánda aldursári og var foreldrum hans því tilkynnt um málið sem og barnaverndaryfirvöldum.

Innlendar Fréttir