Íslenska landsliðið mætir því bosníska í undakeppni Evrópumótsins 2024 á fimmtudag. Mikil umræða á sér stað í Bosníu í aðdraganda leiksins. Hún er þó ekki um leikmann sem er í hópnum, eitthvað sem við Íslendingar könnumst vel við.
Hópur Bosníu fyrir leikinn gegn Íslandi er kominn saman undir stjórn nýs þjálfara, Faruk Hadžibegić.
Hann valdi hins vegar ekki 22 ára gamlan framherja Toulouse, Said Hamulić, í hópinn.
Þetta hefur vakið reiði einhverra, þar á meðal leikmannains að því er virðist. Hamulić þykir spennandi leikmaður en á enn eftir að spila landsleik.
„Ég hef sagt það og segi aftur að dyr landsliðsins standa alltaf opnar. Á meðan ég vel hópinn eru dyrnar alltaf opnar fyrir leikmönnum sem vilja spila. Það eru reglur. Ellefu byrja inn á. Fimm geta komið inn á en restin situr á bekknum. Ég get ekki boðið 60 leikmönnum. Allir ættu að bíða eftir sínu tækifæri,“ segir Hadžibegić við bosníska miðla.
Minnir þetta óneitanlega á mál Arnars Þórs Viðarssonar, landsliðsþjálfara Íslands og Alberts Guðmundssonar.
Albert hefur ekki verið valinn í landsliðið síðan í haust og þeir virðast ekki ná saman.
„Þetta er eins og í fjölskyldu. Ef barnið þitt gerir þig reiðan ertu reiður í smá en elskar það samt,“ segir Hadžibegić.
„Ég hef reynt að hringja í hann, senda honum skilaboð. Hann hefur ekki svarað mér. Hvort sem hann er reiður eða skammast sín, ég vil ekki ræða það. Allt hefur sinn tíma. Það eru tveir leikir fram undan sem eru mun mikilvægari en þetta núna.“
