8 C
Grindavik
15. apríl, 2021

Paolo Rossi er látinn – Einn af bestu knattspyrnumönnum Ítala fyrr og síðar

Skyldulesning

Paolo Rossi er látinn, 64 ára að aldri. RAI TV tilkynnti þetta í morgun en Rossi hafði starfað fyrir sjónvarpsstöðina að undanförnu. Hann er talinn einn af bestu knattspyrnumönnum Ítala fyrr og síðar en hann lék með Juventus og AC Milan og varð heimsmeistari með Ítalíu 1982.

„Mjög sorglegar fréttir: Paolo Rossi er ekki lengur meðal okkar,“ tísti Enrico Varriale, þulur hjá RAI Sport, í morgun. „Ógleymanlegur Pablito sem við urðum öll ástfangin af sumarið 1982 og hefur verið dýrmætur og góður starfsfélagi hjá RAI síðustu ár. Hvíl í friði elsku Paolo,“ skrifaði hann einnig.

Eiginkona Rossi, Cappelletti Federica, birti mynd af sér og Rossi á Instagram skömmu eftir að tilkynnt var um andlát hans en sagði ekkert um dánarorsökina.

Rossi er almennt talinn einn af bestu framherjum allra tíma og fáir hafa gleymt afrekum hans á HM 1982 sem fór fram á Spáni. Í úrslitaleiknum á móti Vestur-Þýskalandi skoraði hann fyrsta markið og á fyrri stigum keppninnar skoraði hann þrennu á móti Brasilíu. Rossi var markahæsti leikmaður úrslitakeppninnar og fékk einnig Golden Ball og Ballon d‘Or þetta sama ár.

En ferill Rossi var ekki alveg hnökralaus. 1980 var hann dæmdur í þriggja ára bann eftir að upp komst að samið hafði verið um úrslit í leik Perugia, þar sem hann lék sem lánsmaður, og Avellino. Mafían kom þar við sögu. Rossi þvertók fyrir aðild að málinu og leikbannið var stytt í tvö ár og byrjaði hann aftur að spila tveimur mánuðum fyrir HM og rétt náði því að vera með í lokakeppninni.

Hann lék allan sinn feril á Ítalíu og sigraði tvisvar í deildakeppninni og í Evrópukeppninni með Juventus 1984.

Innlendar Fréttir