Cristiano Ronaldo fagnar sigurmarki sínu á Old Trafford. AFP/Paul Ellis
Cristiano Ronaldo var allt í öllu hjá Manchester United þegar Norwich, botnlið ensku úrvalsdeildarinnar í knattspyrnu, kom í heimsókn á Old Trafford í Manchester í dag.
Ronaldo gerði sér lítið fyrir og skoraði þrennu í leiknum sem lauk með naumum 3:2-sigri United.
Ronaldo skoraði tvívegis í fyrri hálfleik fyrir United, á 7. og 32. mínútu, áður en Kieran Dowell minnkaði muninn fyrir Norwich undir lok fyrri hálfleiks.
Teemu Pukki jafnaði svo metin fyrir Norwich í upphafi síðari hálfleiks áður en Ronaldo fullkomnaði þrennuna með sigurmarki leiksins á 76. mínútu og þar við sat.
United fer með sigrinum upp í fimmta sæti deildarinnar í 54 stig en Norwich er sem fyrr á botni deildarinnar með 21 stig.
Arsenal tapaði þriðja deildarleiknum í röð í dag. AFP/Daniel Leal
Þá reyndist Jan Bednarek hetja Southampton þegar liðið tók á móti Arsenal á St. Mary’s í Southampton.
Varnarmaðurinn skoraði sigurmark Southampton á 44. mínútu í 1:0-sigri Southampton en þetta var þriðji tapleikur Arsenal í röð í deildinni.
Southampton er með 39 stig í tólfta sætinu en Arsenal er með 54 stig í sjötta sætinu.
Brentford vann svo 2:1-sigur gegn Watford á Vicarage Road í Watford en Brentford er með 39 stig í ellefta sætinu á meðan Watford er með 22 stig í nítjánda sætinu.
