1 C
Grindavik
15. janúar, 2021

Rúnar Alex um það hvort hann geti veitt Leno samkeppni – „Já, 100%“

Skyldulesning

Rúnar Alex Rúnarsson, leikmaður Arsenal, sat fyrir svörum á blaðamannafundi í dag fyrir leik liðsins gegn Rapid Vín í Evrópudeildinni á morgun.

Rúnari líður vel hjá Arsenal og segir að aðlögunin hjá félaginu hafi gengið vel.

Ég hef aðlagast vel, það hefur verið tekið vel á móti mér. Þetta er auðvitað mikil breyting fyrir mig, ég kem frá litlu landi, Íslandi og kem hingað í stórt félag. Þetta hefur gengið vel og er búið að vera gaman. Ég nýt þess að vera hér og er að taka framförum,“ sagði Rúnar á blaðamannafundinum.

Einn helsti styrkleiki Rúnars er hversu öruggur hann er á bolta og er óhræddur við að nota lappirnar. Hann segir að leikstíll Arsenal sé einhvað sem hann kannist við.

„Ég myndi ekki segja að þessi leikstíll sé nýr fyrir mér, ég spilaði svipaðan fótbolta í Danmörku þegar að ég var þar. Stærsta breyting er að ég spila fyrir Arsenal, pressan er meiri, það er pressa á okkur að vinna hvern einasta leik,“ sagði Rúnar.

Rúnar er með skýr markmið og segir að hugarfarið skipti miklu máli.

„Maður vill spila, það skiptir ekki máli í hvaða stöðu maður er. Maður vill alltaf spila og verður að hafa rétt hugarfar. Ég vill spila og vill gera atlögu að því að verða markvörður númer eitt. Ef ég væri ekki með þannig hugarfar þá væri ég í röngu starfi,“ sagði Rúnar

Hann var í kjölfarið spurður að því hvort hann teldi sig geta veitt Bernd Leno, aðalmarkverði Arsenal, samkeppni.

„Já 100%, annars væri ég ekki hjá þessu félagi. Ég verð að hafa rétt hugarfar og trúa að ég sé þess verðugur að spila fyrir félagið og sýna það,“ sagði Rúnar Alex Rúnarsson á blaðamannafundi í dag.

Innlendar Fréttir