Samhæfingarmiðstöð almannavarnadeildar var í dag virkjuð eftir að flugvél flugfélagsins Lufthansa óskaði eftir neyðarlendingu á Keflavíkurflugvelli fyrr í dag vegna mögulegs reyks um borð.
Guðjón Helgason, upplýsingafulltrúi Isavia, segir að ákveðið viðbragð sé sett af stað þegar um tilvik sem þetta sé að ræða.
Á leið til Bandaríkjanna
„Það var einhver melding um hita eða reyk í vélinni og flugmaður og flugfélagið tóku ákvörðun um að lenda í Keflavík útaf því, vélinni var ekki beint hingað,“ segir Guðjón, en vélin var á leið til Bandaríkjanna frá Þýskalandi.
„Mér skilst að það hafi átt að koma önnur vél og sækja farþegana og koma þeim á áfangastað,“ segir Guðjón.
Samkvæmt upplýsingum frá brunavörnum Suðurnesja var viðbúnaður á svæðinu vegna vélarinnar, en lögreglan á Suðurnesjum stýrði aðgerðum.
