8 C
Grindavik
23. apríl, 2021

Sara Sigmunds með góð ráð fyrir íþróttafólk yfir jólin

Skyldulesning

Sport

Sara Sigmundsdóttir er með þrjá svindldaga yfir jólahátíðina.
Sara Sigmundsdóttir er með þrjá svindldaga yfir jólahátíðina.
Instagram/@sarasigmunds

Íslenska CrossFit stjarnan Sara Sigmundsdóttir hefur búið sér til reglur til að komast í gegnum jólahátíðina án þess að rugla of mikið í mataræði sínu.

Það er ekki auðvelt fyrir íþróttafólk að standast allar freistingarnar sem bjóðast yfir hátíðirnar í desember. Þetta er sá tími sem fólk sleppir af sér beislinu í mat og kræsingum og þetta er líka sá tími sem fjölskyldan borðar mikið saman.

Það er því ekkert auðvelt fyrir íþróttafólk að fara sínar eigin leiðir þegar kemur að mataræði um jól og áramót.

Sara Sigmundsdóttir þekkir þetta vel sjálf og hún undirbýr sig fyrir komandi hátíðardagskrá með því að setja sér ákveðnar vinnureglur.

„Jólahátíðin er að renna í hlað og það getur orðið mjög erfitt að halda sér á réttri braut ekki síst þegar maður er að reyna að passa upp á hátíðarmatinn og jólakræsingarnar,“ skrifaði Sara á Instagram síðu sína og gaf fylgjendum sínum síðan upp sínar reglur.

Sara fylgir eftirtöldum vinnureglum yfir hátíðirnar.

Jóla og áramótareglur Söru Sigmundsdóttur:

  • 1. Æfa venjulega.
  • 2. Drekka eitt vatnsglas fyrir hverja máltíð.
  • 3. Borða 500 grömm af grænmeti á hverjum degi.
  • 4. Ekki mæla matinn ofan í þig á Aðfangadagskvöld, Jóladag eða Gamlársdag en fylgja mataræðinu þínu alla aðra daga.
  • 5. Ekki sleppa máltíðum til að eiga mat inni seinna. 6. Aldrei vera með samviskubit vegna þess sem maður borðaði á Aðfangadagskvöld, Jóladag eða Gamlársdag.

Sara Sigmundsdóttir endar síðan á því að fullvissa fylgjendur sína um það að þessi eina vika skiptir ekki svo mikli máli fyrir heildarmyndina heldur miklu frekar allar hinar.

„Það er miklu betra að borða óhollt á milli jóla og áramóta en á milli áramóta og jóla,“ skrifaði Sara á Instagram. Það má sjá færslu hennar hér fyrir neðan.

spot_img
spot_img
spot_img

Innlendar Fréttir