6.3 C
Grindavik
26. september, 2021

Segir að frumvarp um lög á verkfall flugvirkja Landhelgisgæslunnar sé tilbúið

Skyldulesning

Ef samningar takast ekki í kjaradeilu flugvirkja Landhelgisgæslunnar og ríkisins mun ekkert af loftförum Gæslunnar verða til reiðu eftir 14. desember. Aðeins ein þyrla verður tiltæk fram að því og því ljóst að viðbragðsgeta Gæslunnar er mjög skert. Einnig mun ríkja óvissa um lofthæfi þessarar einu þyrlu.

Morgunblaðið skýrir frá þessu í dag og segir þetta koma fram í svari Ásgeirs Erlendssonar, upplýsingafulltrúa Gæslunnar, við fyrirspurn blaðsins. Verkfallið hefur staðið yfir frá 5. nóvember. Í svari sínu bendir Ásgeir á að eftir því sem verkfallið vari lengur, þeim mun lengri tíma taki að byggja upp viðbragðsgetu Gæslunnar á nýjan leik. Þótt verkfallinu lyki í þessari viku yrðu tvær þyrlur aðeins tiltækar í tíu daga í desember. Það liggur því fyrir að áhrifa verkfallsins mun gæta næstu vikur og mánuði.

Morgunblaðið segist hafa heimildir fyrir að í innanríkisráðuneytinu sé lagafrumvarp, sem bindur enda á verkfallið, tilbúið. Blaðið segist einnig hafa heimildir fyrir að ekki sé samstaða innan ríkisstjórnarinnar um hvort leggja eigi frumvarpið fram. Ráðherrar VG eru sagðir hafa lýst sig andsnúna því.

„Ég lagði fram þá valkosti sem eru í stöðunni og einn af þeim er að setja lög á verkfallið. Allir valkostirnir voru ræddir ítarlega á ríkisstjórnarfundinum eins og ég greindi frá eftir hann,“ sagði Áslaug Arna Sigurbjörnsdóttir, dómsmálaráðherra, í samtali við Morgunblaðið en málið var rætt á ríkisstjórnarfundi á þriðjudaginn.

Katrín Jakobsdóttir, forsætisráðherra, sagði í samtali við Morgunblaðið að hún hafi ekki séð neitt frumvarp og að hún leggi áherslu á að „vegna eðlis þessara starfa leggi samningsaðilar sig alla fram við að komast að samkomulagi.“

Deiluaðilar hittast á fundi hjá ríkissáttasemjara klukkan níu í dag.

spot_img
spot_img
spot_img

Innlendar Fréttir