3 C
Grindavik
8. maí, 2021

Segir að sér sé mismunað af Kringlunni vegna heilsufars – „LOKAÐ VEGNA FASISTA- OG ÓLÖGLEGRAR ÁKVÖRÐUNNAR STJÓRNAR KRINGLUNNAR“

Skyldulesning

„LOKAÐ VEGNA FASISTA- OG ÓLÖGLEGRAR ÁKVÖRÐUNNAR STJÓRNAR KRINGLUNNAR“ stendur skýrum og stórum stöfum á A4 blaði fyrir utan kaffihúsið Café Roma í Kringlunni. Fyrir neðan þennan texta er gefið upp símanúmer og frekari upplýsingum lofað.

Zoran Kokotovic er rekstrarstjóri Café Roma í Kringlunni en hann glímir við heilsufarsvandamál og er með vottorð sem segir til um að hann sé undanþeginn grímuskyldu vegna þeirra. Þrátt fyrir það glímir hann við mikil vandamál í Kringlunni þar sem er grímuskylda, óháð vottorðum. Honum er ekki heimilt að nota salernin né neitt annað utan hans svæðis nema hann sé með grímu fyrir vitum sér.

„Íslenskur læknir skrifaði undir þetta vottorð, ég er alltaf með skilríki og ég er alltaf með vottorð“ segir Zoran og bendir á að í reglunum sem birtar eru á Covid.is kemur fram að þeir sem glíma við heilsufarsleg vandamál og eru með vottorð sem sýnir það þurfa ekki að vera með grímur.

„Þetta er brot á mannréttindalögum, þetta frá landlækni er regla en mannréttindalögin eru lög og lög eru yfir reglunni,“ segir Zoran og vísar í texta frá Mannréttindaskrifstofu Íslands. Textann má lesa hér fyrir neðan:

Réttur til jafnræðis og bann við mismunun er eitt af grundvallarhugtökum í alþjóðlegum mannréttindalögum. Hægt er að skilgreina mismunun sem hverskonar aðgreiningu, útilokun eða forgangsrétt sem byggður er t.d. á kynþætti, litarhafti, kynferði, trú, heilsufari, aldri, fötlun, stjórnmálaskoðunum, þjóðaruppruna eða félagslegri stöðu.

Zoran segist þekkja til fólks í öðrum þjóðum Evrópu og í Ástralíu þar sem þetta vandamál er ekki til staðar. Hann segir að vinir sínir á meginlandinu hafi sagt sér að þar séu læknisvottorð vegna grímuskyldu tekin gild án athugasemda. „Ég var að hringja í þá alla og komst að því að það er ekkert vandamál þar, bara á Íslandi.“

Hann hefur líka lent í vandræðum þegar hann fer í Bónus til að kaupa í matinn en þar er hann stöðvaður og beðinn um að setja upp grímu. Hann segist þá vera með vottorð og sýnir auk þess að hann sé í raun með grímu á sér, hann geti bara ekki notað hana vegna heilsufarsvandamála. „Þau segja: „Nei, þú verður að setja yfir nefið og munninn“. Þá segi ég: „Fyrirgefðu, ég get ekki gert það vegna heilsufarsvandamála, ég er með vottorð“. Þau segja þá: „Mér er alveg sama um læknisvottorð, ef þú setur ekki upp grímu þá kemur þú ekki inn“. Þetta er mismunun vegna heilsufars.“

„Hver stjórnar lögreglunni?“

Þá segir Zoran frá því þegar hann fór í aðra verslun í Kringlunni ásamt dóttur sinni sem er fædd árið 2006. Hvorugt þeirra var með grímu, hann var með læknisvottorð en hún er undanþegin grímuskyldu vegna aldurs. Hann segir að þeim hafi verið meinaður aðgangur að versluninni og að lögreglan hafi verið kölluð til. Hann segist hafa sýnt lögreglunni vottorðið en það breytti engu, lögreglan var hörð á því að þau skyldu fara út ef þau væru ekki með grímu. Þá segir hann að lögreglan hafi verið reið og grætt dóttur hans sem sé nú hrædd við lögregluna.

Zoran veltir því jafnframt fyrir sér hvers vegna lögreglan sé ekki að fara eftir Covid-reglum stjórnvalda enda sé það skýrt að þeir sem fæddir eru 2005 og síðar og þeir sem glíma við heilsufarsvandamál séu undanþegin grímuskyldu. „Hver stjórnar lögreglunni? Er þetta eitthvað valdarán eða hvað? Þetta er mjög skrýtið að lögreglan fari og hendi fólki út og vilji ekki fylgja reglunum. Er þetta valdarán búið eða er það í gangi?“ spyr Zoran.

„Það eru reglugerðir um það en það gildir ekki í þessu húsi“

DV ræddi við Sigurjón Örn Þórisson, framkvæmdastjóra Kringlunnar, vegna málsins. Sigurjón staðfesti það sem Zoran hafði sagt, það er að grímuskylda sé í verslunarmiðstöðinni óháð vottorðum. „Honum er ekki heimilt að fara um sameign hússins án grímu, hér gilda reglur um grímuskyldu í húsinu,“ segir Sigurjón. „Hann hefur heimild til að vera án grímu í sínu rými sem hann er að leigja. Hann hefur verið með það þannig lengst af en þetta hefur ágerst með tímanum, barátta hans fyrir þessum réttindum sínum.“

Sigurjón segir þá að einstaklingar sem hafa í förum sínum vottorð sem segir að þeir séu undanþegnir grímuskyldu þurfi samt að vera með grímur í Kringlunni. Blaðamaður spyr hann þá út í Covid reglurnar þar sem skýrt kemur fram að einstaklingar sem eru með vottorð séu undanþegnir grímuskyldu.

„Það eru reglugerðir um það en það gildir ekki í þessu húsi eins og víðast hvar annars staðar, það er engin undanþága frá grímuskyldu. Það er alltof mikið flækjustig í því að vera hér með eftirlit og biðja fólk um sannanir og vottorð um það að það sé annað hvort búið að fá Covid eða sé með vottorð þar af leiðandi. Þú getur ímyndað þér hvernig það væri.“

spot_img
spot_img
spot_img

Innlendar Fréttir