3 C
Grindavik
8. maí, 2021

Segir ESB ekki hafa þörf fyrir Sputnik V bóluefni Rússa

Skyldulesning

Thierry Breton, sem á sæti í framkvæmdastjórn ESB, segir að sambandið hafi ekki þörf fyrir rússneska Sputnik V bóluefnið því hægt sé að ná hjarðónæmi í álfunni með evrópskum bóluefnum. Breton fer með málefni innri markaðar sambandsins í framkvæmdastjórninni.

„Við höfum alls enga þörf fyrir Sputnik V,“ sagði hann í samtali við frönsku TF1 sjónvarpsstöðina.

Ummæli hans hafa vakið nokkra athygli í ljósi þess að framkvæmdastjórnin hefur verið gagnrýnd fyrir að það hafi gengið of hægt að bólusetja íbúa ESB-ríkjanna. „Í dag höfum við getu til að afhenda 300 til 500 milljónir skammta fyrir júní. Við eigum möguleika á að ná upp hjarðónæmi í Evrópu um miðjan júlí,“ sagði Breton.

Hann sagði jafnframt að ESB gæti, ef þörf krefur, aðstoðað Rússa við framleiðslu Sputnik V en Evrópa verði að vera í forgangi.

Í kjölfar viðtalsins birtust færslur á Twitteraðgangi framleiðanda Sputnik V þar sem Breton var sakaður um að hafa fyrir fram tekið neikvæða afstöðu gagnvart bóluefninu. „Ef þetta er opinber afstaða ESB ert þú beðinn um að tilkynna okkur um að ekki sé nauðsynlegt að halda áfram með samþykktarferli hjá Evrópsku lyfjastofnuninni vegna pólitískra fordóma þinna. Við höldum áfram að bjarga mannslífum í öðrum löndum,“ var skrifað.

Evrópska lyfjastofnunin byrjaði að leggja mat á Sputnik V í byrjun mars en það ferli getur síðan opnað fyrir markaðsleyfi bóluefnisins í ESB.

Fyrir helgi kom fram að framleiðendur Sputnik V hafa nú samið við fyrirtæki í Frakklandi, Ítalíu, Spáni og Þýskalandi um framleiðslu bóluefnisins.

Vísindaritið The Lancet birti í febrúar rannsókn sem sýnir að Sputnik V sé öruggt bóluefni sem sýni rúmlega 90% virkni. 3,5 milljónir Rússa hafa fengið tvo skammta af bóluefninu.

spot_img
spot_img
spot_img

Innlendar Fréttir