7 C
Grindavik
15. apríl, 2021

Sitja uppi með tí­faldan máls­kostnað eftir að hafa neitað að greiða 80 þúsund króna skuld

Skyldulesning

Eignarhaldsfélagið Summus hefur verið dæmt til að greiða tryggingarfélaginu Sjóvá 80 þúsund króna skuld sem félögin tókust á um fyrir dómi. Summus þarf einnig að greiða Sjóva 800 þúsund krónur í málskostnað, tífalda þá upphæð sem deilt var um.

Málið má reikja til þess að Sjóvá greiddi fyrir viðgerð á bíl í eigu Summus, sem rekur bílaleigu, varð fyrir tjóni. Kostnaður vegna viðgerðarinnar nam 414 þúsund krónum, þar af 80.184 krónur í virðisaukaskatt.

Sjóvá krafði Summus um endurgreiðslu á virðisaukaskattinum á þeim grundvelli að það væri á virðisaukaskattskrá. Félagið gæti því talið virðisaukaskattinn af viðgerðinni til innskatts hjá sér eftir almennum reglum um frádrátt virðisaukaskatts. Miðað við þessa frádráttarheimild ætti að miða bótafjárhæð við kostnað við viðgerðina án virðisaukaskatts.

Þessu vildi Summus ekki una og kemur fram í dómi Héraðsdóms Reykjavíkur sem féll í gær að innheimtutilraunir Sjóvár hafi ekki borið árangur.

Sögðust aldrei hafa haft fjárhæðina undir höndum

Málsvörn Summus byggðist einkum á því að félaginu væri ekki skylt að innskatta virðisaukaskatt sem falli á tryggingarfélagið vegna tjónsviðgerða á bíla sem væru í eigu félagsins, þó svo að það kynni að vera heimilt. Félagið hafi aldrei innskattað höfuðstól kröfunnar, umræddar 80 þúsund krónur, og félagið hafi því aldrei haft undir höndum þá fjárhæð sem tryggingafélagið krafðist.

Sjóvá hafði betur.Vísir/Hanna

Í niðurstöðu hérðaðsdóms segir að tjónþola beri skylda til þess að takmarka tjón sitt. Í því felist að honum beri að gæta þeirra úrræða seme hann eigi rétt á samkvæmt lögum til þess að takmarka tjón sitt.

Segir í niðurstöðunni að óumdeilt sé að Summus sé heimilt að telja virðisaukaskatt af viðgerðarkostnaði til innskatts. Taldi dómurinn það ekki hafa þýðingu fyrir úrlausn málsins að félaginu væri ekki skylt að nýta sér þessa heimild. Féllst dómurinn því á það að miða ætti bótafjárhæð við kostnað við viðgerðina án virðisaukaskatts.

Summus þarf því að greiða Sjóvá umræddar 80 þúsund krónur auk dráttarvaxta frá 17. ágúst á síðasta ári til greiðsludags. Þá þarf félagið einnig að greiða Sjóvá 800 þúsund krónur í málskostnað vegna málsins, eða um tífalda þá upphæð sem deilt var um.

Innlendar Fréttir