Helgi Fannar Sigurðsson skrifar frá Liechtenstein
Það var létt yfir Jóhanni Berg Guðmundssyni eftir sigur íslenska landsliðsins á Liechtenstein fyrr í dag.
Um annan leik liðanna í undankeppni EM 2024 var að ræða. Ísland tapaði gegn Bosníu-Hersegóvínu, 3-0, á fimmtudag.
Ísland vann 7-0 í dag og skoraði fyrirliðinn Aron Einar Gunnarsson óvænta þrennu.
„Þetta var flott hjá þessum hérna. Flott þrenna hjá honum,“ sagði Jóhann og hló þegar Aron mætti í mynd.
Þessi leikur var mjög frábrugðinn einvíginu við Bosníu.
„Við vissum að við yrðum mikið með boltann en það þarf að brjóta þessi lið niður og við gerðum það snemma.
Þetta var allt öðruvísi leikur og andstæðingur sem við teljum okkur eiga að vinna. En auðvitað var mikilvægt fyrir okkur að ná svona mikið af mörkum á þá, bæta þessa markatölu.“
Það er samheldni í íslenska hópnum þó svo að hallað hafi undan fæti síðustu daga.
„Við erum allir í þessu saman. Við vitum að við vorum ekki nógu góðir á móti Bosníu. Það er eitthvað sem gerist því miður í fótbolta. Við áttum bara lélegan dag. Við erum búnir að horfa til baka á þær klippur. Við lærum vonandi af því næst þegar við spilum á móti Bosníu.“
Í sumar mætir Ísland Portúgal og Slóvakíu í Laugardalnum.
„Þetta verður allt annað í sumar. Það er eitthvað sem við þurfum að undirbúa okkur fyrir og spila betur en við gerðum á móti Bosníu. Vonandi fáum við fullt af liði á völlinn á okkar heimavelli og ná í stig á móti þessum liðum.“
Ítarlegra viðtal er hér að neðan.
