-1 C
Grindavik
21. janúar, 2021

Skipverjar glími enn við eftirköst

Skyldulesning

Togarinn Júlíus Geirmundsson bundinn við bryggju.

Margir skipverjanna sem veiktust af Covid-19 um borð í Júlíusi Geirmundssyni fyrr í vetur eru enn óvinnufærir. Sjópróf fóru fram við Héraðsdóm Vestfjarða í dag vegna málsins, en ákvörðunin um að láta sjópróf fara fram var tekin við þingfestingu málsins í Héraðsdómi Reykjaness 13. nóvember. 

Alls veiktust 22 af 25 skipverjum í veiðiferð í október og veiðum var haldið áfram þrátt fyrir grun um smit um borð. 

Fram kemur á Vísi að við sjópróf sögðust skipverjar ekki hafa verið neyddir til að vinna á meðan þeir voru veikir. Þeir hafi hins ekki haft samvisku í að liggja lengi í koju þegar vaktin var undirmönnuð.

Lögmaður stéttarfélaga sjómanna fór fram á sjópróf. Hann segir ljóst að sumir sjómannanna glími enn við eftirköst þess að hafa sýkst af kórónuveirunni. Sumir séu óvinnufærir og kunni að hafa orðið fyrir varanlegu heilsutjóni. 

Lögreglan á Vestfjörðum hefur sagt að rannsókn málsins sé á lokastigi og að innan tíðar komi í ljós hvort lengra verði farið með málið.

Innlendar Fréttir