2.3 C
Grindavik
27. janúar, 2023

Stenst ekki að leggja matarlím og kollagen að jöfnu

Skyldulesning

Lára G. Sigurðardóttir, læknir og doktor í lýðheilsuvísindum.

Lára G. Sigurðardóttir, læknir og doktor í lýðheilsuvísindum. Ljósmynd/Aðsend

„Ég myndi aldrei mæla með því að borða matarlím fyrir nokkurn mann.“

Þetta segir Lára G. Sigurðardóttir, læknir og eigandi húðmeðferðarstofunnar Húðin, í kjölfar greinar sem birt var á Vísindavef Háskóla Íslands í dag.

Lára er í fyrirsvari fyrir Feel Iceland, sem er stærsti söluaðili kollagen-fæðubótarefnis á Íslandi.

Að mati Láru er það ansi athyglisvert að í svari Vísindavefsins sé ekki vísað í neina vísindarannsókn eða vísindagrein. Telur hún það varhugavert að Vísindavefurinn skuli birta slíkt svar.

Telur hún það óvandað að alhæfa, eins og gert hafi verið, um kollagen án þess að hafa neinar vísindarannsóknir á bak við það. Þá segir hún að til séu margar rannsóknir sem sýni fram á jákvæð áhrif kollagens.

Telur Lára að umrætt svar Vísindavefsins muni ekki koma til með að hafa áhrif á eftirspurn fyrir fæðubótarefninu, þar sem að fólki líði vel og finni fyrir jákvæðum áhrifum eftir inntöku fæðubótarefnisins.  

Stenst ekki að leggja matarlím og kollagen að jöfnu 

Telur Lára það ekki standast að leggja matarlím og kollagen-fæðubótarefni að jöfnu.

Bendir hún á að kollagen sé brotið niður í enn smærri próteineiningar en matarlím og því mun auðveldara fyrir líkamann að nýta kollagenið, þar sem að þarmarnir geti tekið það beint upp. Aftur á móti þurfi meltingarensím til að brjóta niður matvæli á borð við matarlím og dýraafurðir, til að nýta kollagenið.

Auk þess bendir Lára á að matarlím innihaldi mikinn sykur og önnur aukaefni sem séu skaðleg heilsu fólks.

Feel Iceland selur fæðubótarefni úr kollagen.

Feel Iceland selur fæðubótarefni úr kollagen. Ljósmynd/Aðsend

Kollagen ekki fyrir alla en virkar fyrir ákveðinn hóp 

Lára segist sammála því að maður fái sömu amínósýrur úr fjölbreyttu mataræði og maður myndi fá frá kollagen-fæðubótarefni.

Kosturinn við fæðubótarefnið sé hins vegar sá að þegar að upptaka og nýting próteina minnkar, eins og þegar fólk eldist eða hjá fólki sem er með lélegri meltingu, geti kollagen hjálpað. 

Lára tekur þó fram að auðvitað hafi ekki allir gagn af kollageni. Segir hún að ungt og hraust fólk þurfi ekkert endilega á auknu kollageni að halda en margar rannsóknir bendi til þess að íþróttafólk og fólk yfir 35 ára hafi oft gott af kollageni. 

Kollagen af eigin reynslu 

Lára hefur aðeins góða hluti að segja um kollagen af sinni eigin reynslu.

Segir hún fæðubótarefnið hafa gjörsamlega bjargað heilsu hennar þrátt fyrir að hún hafi ekki haft mikla trú á því til að byrja með.

Kveðst hún hafa tekið eftir því eftir tvær til þrjár vikur af því að hafa innbyrt kollagen að augnhárin hennar, sem voru farin að týna tölunni, væru komin aftur. Þar að auki heldur Lára því fram að meltingin hennar hafi batnað til muna.

Þrátt fyrir það bendir hún á að einhver önnur í hennar sporum gæti tekið kollagen án þess að finna fyrir sömu áhrifum.  

Segist Lára þekkja til margra sem þjáist af liðagigt sem hafa náð meiri bata með kollageni en bólgueyðandi lyfjum.

Lára bendir á að bólgueyðandi lyf geti haft skaðleg áhrif á þarmana og nýrun og fleira og reynist kollagen því oft betur fyrir fólk. 

Verðið felst í gæðunum 

Segir hún þá ástæðuna fyrir verði kollagen-fæðubótarefnisins vera þá vinnu sem fer í að framleiða það.

Að því leyti felst verðið í gæðunum og því hversu hreint efnið er, þar sem ekki er búið að bæta neinum aukaefnum í blönduna. Bendir hún þar að auki á að verðið sé svipað á kollageni hér og fyrir utan landsteinana.

spot_img
spot_img
spot_img

Innlendar Fréttir