Stólarnir ósigraðir í Síkinu í úrslitakeppni í rúma 23 mánuði – Vísir

0
141

Stólarnir ósigraðir í Síkinu í úrslitakeppni í rúma 23 mánuði Tindastóll getur stigið stórt skref í átta að fyrsta Íslandsmeistaratitli félagsins í kvöld þegar þeir fá Valsmenn í heimsókn í Síkið á Sauðárkróki.

Stólarnir unnu fyrsta leikinn með einu stigi á Hlíðarenda en þeir hafa unnið tvo fyrstu leikina í síðustu tveimur einvígum sínum á móti Keflavík í átta liða úrslitum og Njarðvík í undanúrslitum.

Komist Tindastólsliðið í 2-0 verður fær liðið þrjú tækifæri til að tryggja sér titilinn sem liðið missti til Vals í oddaleik í fyrra.

Annar leikur liðanna hefst klukkan 19.15 í kvöld og verður sýndur beint á Stöð 2 Sport og hefst útsendingin klukkan 18.30.

Síkið hefur verið magnaður heimavöllur fyrir Stólanna í úrslitakeppninni undanfarin ár. Þeir hafa nú unnið ellefu heimaleiki í röð í úrslitakeppni.

Það eru alls liðnir rúmir 23 mánuðir síðan að Tindastólsliðið tapaði heimaleik í úrslitakeppninni en það var 18. maí 2021 á móti Keflavík (74-86) í leik tvö í átta liða úrslitum 2021.

Valsmenn búa þó að því að þeir unnu síðasta leik sinn í Síkinu en það var deildarleikur í lok desember á síðasta ári. Valsliðið vann þá sex stiga sigur á Tindastól, 84-78, en sá leikur endaði í framlengingu.

Pavel Ermolinskij var þá ekki tekinn við Tindastólsliðinu en liðið hefur spilað betur og betur með hverjum mánuði undir hans stjórn. Stólarnir hafa unnið fjóra fyrstu heimaleiki sína í úrslitakeppninni með samtals 96 stigum eða 24 stigum að meðaltali í leik.

Hér fyrr neðan má sjá þessa ótrúlegu sigurgöngu Stólanna í Síkinu.

Síðustu ellefu heimaleikir Tindastóls í úrslitakeppni Undanúrslit 2023 41 stigs sigur á Njarðvík (117-76) 11 stiga sigur á Njarðvík (97-86) Átta liða úrslit 2023 18 stiga sigur á Keflavík (97-79) 26 stiga sigur á Keflavík (107-78) Lokaúrslit 2022 2 stiga sigur á Val (97-95) 16 stiga sigur á Val (91-75) Undanúrslit 2022 6 stiga sigur á Njarðvík (89-83) 9 stiga sigur á Njarðvík (116-107) í tvíframlengdum leik Átta liða úrslit 2022 14 stiga sigur á Keflavík (88-85) 1 stigs sigur á Keflavík (95-94) í framlengdum leik 21 stigs sigur á Keflavík (101-80) 7-0 á heimavelli í fyrra 4-0 á heimavelli í ár