Gylfi Þór Sigurðsson. Ljósmynd/Szilvia Micheller
Sumarbústaður Gylfa Þórs Sigurðssonar, knattspyrnumanns, í Grímsnesi hefur verið settur á uppboð á vef Sýslumannsins á Suðurlandi að beiðni Skattsins.
Vísir greindi fyrst frá.
Á vef Skattsins er útskýrt að byrjun uppboðs sé annað skref í nauðungarsölu á fasteignum. Framhaldssala er lokastig nauðungarsölu fasteigna. Þar segir einnig að nauðungarsala sé framkvæmd til þess að greiða upp þær skuldir sem hvíla á eigninni.
Framhaldssala verður að fara fram í apríl
Byrjun uppboðsins mun fara fram á skrifstofu sýslumanns 31. mars. Eignin er þá boðin upp í fyrst skipti og síðar verður ákveðið hvenær framhaldssala fari fram. Framhaldssalan verður að fara fram innan 4 vikna frá því að byrjun uppboðs fer fram.
Gylfi Þór er til rannsóknar lögregluyfirvalda á Englandi vegna gruns um brot gegn barni. Síðasta sumar var hann handtekinn vegna málsins en síðar var honum sleppt gegn tryggingu og hann settur í farbann.
