Sýknaður af ákæru um kynferðisbrot gegn eiginkonunni – Þvinguð munnmök voru „ekki viljandi“ – DV

0
99

Hvað gerðist á heimili hins ákærða og eiginkonu hans dag einn í febrúar er eitthvað sem fáir vita en niðurstaða dómstólsins um atburðarásina liggur fyrir. Maðurinn, sem er fertugur, mætti fyrir dóm í Óðinsvéum í Danmörku í síðustu viku. Hann var ákærður fyrir að hafa beitt eiginkonu sína ofbeldi.

Dómari ákvað að réttarhöldin skyldu vera lokið og því fengu fulltrúar fjölmiðla ekki að vera viðstaddir en saksóknarinn í málinu, Cecilie Quist, ræddi við þá að dómsuppkvaðningu lokinni að sögn Fyens Stiftstidende.

Áður en blaðamenn voru sendir út úr dómsalnum las Quist ákæruna upp í heyranda hljóði. Í henni kom fram að maðurinn var ákærður fyrir að hafa slegið eiginkonu sína utan undir, að hafa tekið harkalega í hár hennar, þrýst andliti hennar ofan í dýnuna og haldið henni fastri.

Hann var einnig ákærður fyrir að hafa slegið hana ítrekað með krepptum hnefa víðs vegar um líkamann, sparkað í hana og neytt hana til munnmaka á meðan hann hélt höfði hennar föstu.

Fór Quist fram á fangelsisdóm yfir manninum.

Verjandi hans krafðist sýknu og hafði betur að sögn Quist.

„Dómurinn taldi ekki sannað að hann hafi ætlað að neyða hana til munnmaka,“ sagði hún og bætti við að nú muni ákæruvaldið í samráði við ríkissaksóknara taka ákvörðun um hvort dómnum verði áfrýjað.

Þar sem þinghaldið var lokað er ekki vitað hvað það var sem kom fram fyrir rétti sem fékk dómarann og tvo meðdómendur hans til að komast að þeirri niðurstöðu að maðurinn hafi „ekki viljandi neytt eiginkonu sína til munnmaka“.