2 C
Grindavik
28. nóvember, 2020

Tekinn 22 sinnum af lögreglu

Skyldulesning

Lögreglan stöðvaði för bifreiðar í Austurbænum í nótt en ökumaðurinn, sem er 18 ára, hefur aldrei öðlast ökuréttindi. Hann gaf lögreglu ítrekað upp ranga kennitölu og hefur lögregla ítrekað, alls 22 skipti, haft afskipti af honum vega sömu brota. Lyklar bifreiðarinnar voru haldlagðir.

Lögreglan handtók mann í annarlegu ástandi á stofnun í Austurbænum (hverfi 108) á sjöunda tímanum í gær en hann er grunaður um líkamsárás.  Maðurinn mun hafa ráðist á starfsfólk og er hann vistaður fyrir rannsókn máls í fangageymslu lögreglu. Áverkar sagðir minniháttar. 

Á ellefta tímanum í gærkvöldi var ölvaður maður handtekinn þar sem hann reyndi að stela hjólbörðum undan bifreið í Árbænum. Vitni komu að manninum þar sem hann var að losa  hjólbarða undan bifreið og tilkynntu málið til lögreglu. Hann er vistaður fyrir rannsókn máls í fangageymslu lögreglu.

Tilkynnt var til lögreglu um búðarhnupl í Austurbænum (hverfi 108) á þriðja tímanum í nótt en maðurinn var búinn að setja varning innan klæða. Lögregla kom á vettvang og var skrifuð skýrsla um málið. 

Fjórir voru stöðvaðir fyrir akstur undir áhrifum fíkniefna eða áfengis í Hafnarfirði og Breiðholti og einn þeirra var með fíkniefni á sér. Annar hefur ítrekað verið stöðvaður án ökuréttinda í umferðinni. Í fimmta tilvikinu var ökumaðurinn ekki undir áhrifum vímuefna en farþegi í bifeiðinni var með fíkniefni á sér.

Innlendar Fréttir