8 C
Grindavik
15. apríl, 2021

Telja sig hugsanlega hafa fundið nýtt ofureldfjall

Skyldulesning

Í heiminum eru til nokkur ofureldfjöll, til dæmis í Bandaríkjunum, Nýja-Sjálandi, Indónesíu og Japan. Yellowstone í Bandaríkjunum er líklega það þekktasta. Nú hafa vísindamenn hugsanlega fundið enn eitt ofureldfjallið.

National Geographic skýrir frá þessu. Það er teymi vísindamanna frá American Geophysical Union sem stendur á bak við uppgötvunina. Teymið rannsakaði eldfjallaeyjur, sem nefnast Islands of the Four Mountains, í Alaska. Niðurstaða þeirra er að þessi frekar litlu eldfjöll séu tengd saman og séu í raun hluti af sameiginlegu ofureldfjalli. Vísindamennirnir leggja áherslu á að þessi uppgötvun þýði ekki að alvarleg hætta steðji að heimsbyggðinni. „Þessi nýja þekking gerir heiminn ekki hættulegri. Við þurfum ekki að gera nýtt hættumat,“ sagði John Power, jarðeðlisfræðingur við U.S. Geological Survey og Alaska Volcano Observatory.

Það var nánast fyrir tilviljun að nýja ofureldfjallið uppgötvaðist. Vísindamenn fóru til Alaska til fornleifarannsókna. Í þeirri rannsókn sáu þeir ýmis merki þess að gosið hefði á svæðinu fyrir margt löngu og að þar hefðu gríðarlega stór eldgos orðið. Það gerði vísindamönnum erfitt fyrir að yfirborð eldfjallsins, sem er 19 km í þvermál, er mörg hundruð metra undir yfirborði Kyrrahafsins.

BBC segir að vísindamenn veiti ofureldfjöllum mikla athygli vegna þess hversu gríðarleg áhrif gos í þeim geta haft. Þau gjósa sem betur aðeins á 100.000 ára fresti að meðaltali. Þegar Yellowstone-eldfjallið í Wyoming gaus fyrir 600.000 árum komu 1.000 rúmkílómetrar af ösku og hrauni upp. Þetta magn nægir til að grafa stórborg undir margra kílómetra þykku lagi. Gosið í Yellowstone er athyglisvert því eldfjallið er ógn við öll Bandaríkin.

Innlendar Fréttir