Arnar Þór Viðarsson var í gær rekinn úr starfi landsliðsþjálfara íslenska karlalandsliðsins í knattspyrnu. Vanda Sigurgeirsdóttir, formaður KSÍ segir að hún og stjórn KSÍ hafi ekki lengur haft trú á því að Arnar væri rétti maðurinn í starfið.
Vanda hefur ítrekað svarað fyrir um framtíð Arnars Þórs og fyrir aðeins örfáum mánuðum svaraði hún til um framtíð Arnars.
Þann 29 september sendi Fréttablaðið fyrirspurn á Vöndu um viðræður hennar við Heimi Hallgrímsson sem komust þá í fréttirnar.
„Að mínu mati er Arnar Þór á réttri braut með liðið, það er stígandi í leikjunum og frammistöðunum, við sjáum það t.d. í þeirri staðreynd að liðið er taplaust í 6 leikjum, og tölfræðin sem kemur úr greiningu á leikjunum styður það. Einnig var liðsandinn og baráttan til mikillar fyrirmyndar í leiknum gegn Albaníu í gær,“ sagði Vanda í september.
Tapið í Bosníu virðist hafa breytt þessari traustsyfirlýsingu Vöndu sem kom í september.
Starfslok Arnars eru að vekja mikla athygli úti í heimi og eru greint frá tíðindunum í fjölmiðlum víða í Evrópu. Er því helst slegið upp í fyrirsögn í þeim miðlum að Arnar hafi verið rekinn eftir 7-0 sigur í síðasta leik sínum með liðið.
