7.3 C
Grindavik
24. október, 2021

Þörungablómi á Austfjörðum getur valdið fiskdauða

Skyldulesning

Creatium lineatum í sýni úr Reyðarfirði frá 15. september 2021. Myndin er tekin í gegnum smásjá með 10×20 stækkun.

Ljósmynd/Hafrannsóknastofnun

Borið hefur á miklum þörungablóma inni á Reyðarfirði og á Seyðisfirði undanfarna daga, jafnvel víðar á Austfjörðum. Sýni frá Reyðarfirði bárust Hafrannsóknastofnun til greiningar í gær, að því er fram kemur á vef stofnunarinnar.

Þar segir að greiningin hafi leitt í ljós að um sé að ræða skoruþörunginn Ceratium lineatum. „Blómi þessarar tegundar er ekki alveg óþekkt fyrirbæri hér við land og sást til dæmis töluvert af henni í Breiðafirði í ágúst síðastliðnum.“

Þá eru Ceratium-tegundir sagðar þekktar fyrir að fjölga sér hratt við ákveðnar aðstæður og valda svo miklum blóma að þörungabreiðurnar verða sjáanlegar á yfirborði sjávar. „Þó að þörungarnir sjálfir myndi ekki eitur og séu þannig ekki eiturþörungar, geta svo miklir blómar valdið álagi á vistkerfið og jafnvel orsakað fiskdauða. Það er vegna þess að þörungarnir geta sest í tálkn fiskanna og þá er það einkum fjöldi þeirra í hverjum lítra sjávar sem veldur álaginu.“

Þekkt er að að blómi svifþörunga geti orðið að haustlagi þegar lagskiptingin við yfirborð fer að brotna upp og næringarefni berast við þá blöndun til yfirborðslagsins þar sem birtu nýtur, að því er segir í tilkynningunni. „Ekki eru til nýjar umhverfismælingar úr Reyðarfirði en athuganir voru gerðar í Fáskrúðsfirði um miðjan ágúst, þá var þar skýr lagskipting við yfirborð. Blómans er vart víða við Austfirði þannig að þau skilyrði sem ýta undir svo stórfelldan blóma svifþörunga eru ekki einungis bundin við Reyðarfjörð.“

spot_img
spot_img
spot_img

Innlendar Fréttir