2 C
Grindavik
15. janúar, 2021

Þýskur gjörgæslulæknir – „Við erum á mörkum þess mögulega“

Skyldulesning

Talsmaður samtaka þýskra gjörgæslulækna vill að stjórnvöld grípi til enn harðari sóttvarnaaðgerðar vegna heimsfaraldurs kórónuveirunnar. Ástæðan er mikið álag á heilbrigðiskerfi landsins en að meðaltali eru aðeins þrjú laus legurými á gjörgæsludeildum landsins. Gernot Marx,  formaður samtaka gjörgæslulækna, varar við þeirri stöðu sem er uppi.

Bild skýrir frá þessu. „Við erum í einstökum aðstæðum ólíkum öllu því sem við höfum upplifað í sögu gjörgæslu. Við erum á mörkum þess mögulega,“ sagði Marx sem starfar á gjörgæsludeild háskólasjúkrahússins í Aachen. Þangað koma fjórir nýir sjúklingar á dag að meðaltali. Níu eru í öndunarvél en ekki er hægt að hafa fleiri í öndunarvél samtímis þar sem ekki er nægilega margt starfsfólk til að annast sjúklingana.

Á síðustu sólarhringum hafa rúmlega 11.000 greinst með kórónuveiruna á hverjum sólarhring og tugir láta lífið daglega. Í heildina hafa rúmlega 16.000 látist af völdum veirunnar til þessa og rúmlega ein milljón hefur smitast.

Marx var með skýr skilaboð til stjórnvalda um aðgerðir vegna faraldursins: „Ef þetta snýst um að bjarga mannslífum þá hefðu síðustu sóttvarnaaðgerðir átt að vera enn harðari.“

Innlendar Fréttir