Verzlunarskóli Íslands. Sigurvíma verslinganna átti eftir að reynast skammvinn. mbl.is/Kristinn Magnússon
Menntaskólinn í Reykjavík mætti Verzlunarskóla Íslands í undanúrslitaviðureign MORFÍs í gær sem endaði með sigri Verzlunarskólans. Fór því eflaust margur verslingurinn í sigurvímu út í páskahelgina.
Sú sigurvíma átti þó eftir að reynast skammvinn.
Seinna um kvöldið var gefin út yfirlýsing frá stjórn keppninnar á Facebook, þar sem úrslitin voru leiðrétt. Innsláttarvilla hafði orðið til þess að gleymst hafði að draga frá refsistig í keppninni sem, þegar leiðrétt var, dugði til þess að taflið snerist við.
Gerðist líka í fyrra
Eins og glöggir muna eftir þá urðu svipuð mistök í MORFÍs-keppni í fyrrasumar, þá í úrslitum. Þá voru mistökin þó leiðrétt þegar í stað, í stað þess að vera tilkynnt klukkustundum síðar.
Á samfélagsmiðlum, til að mynda í ummælum við færslu keppninnar, sem og á Twitter, mátti sjá menntskælinga lýsa ýmist yfir óánægju og ánægju, en aðallega furðu.
Sólrún Dögg Jósefsdóttir, formaður skólafélagsins í MR, sló á létta strengi og líkti mistökunum við talningarmálið í Borgarnesi í alþingiskosningunum í fyrra.
vil nuna ekki heyra mukk i viðbot um vitlausu talninguna i kosningunum siðasta haust #morfis
— sólrún dögg (@Solrunjosefs) April 16, 2022
Þá sagðist Jón Bjarni Snorrason ekki vilja verða á vegi hörðustu Verzló-stuðningsmannanna eftir leiðréttinguna.
