2.3 C
Grindavik
27. janúar, 2023

Tónlistarmiðstöð stofnuð á næsta ári

Skyldulesning

Lilja Dögg Alfreðsdóttir menningarmálaráðherra.

Lilja Dögg Alfreðsdóttir menningarmálaráðherra. Ljósmynd/Birgir Ísleifur

Stofnun Tónlistarmiðstöðvar verður að veruleika strax á næsta ári, en henni er ætlað er að verða einn af hornsteinum íslensks tónlistarlífs og tónlistariðnaðar, að því er kemur fram í tilkynningu.

Í nýrri fjármálaáætlun koma fram áherslur menningarmálaráðherra og ríkisstjórnarinnar um aukinn stuðning við íslenskt tónlistarfólk og mikilvægi þess að Tónlistarmiðstöð taki til starfa í upphafi árs 2023.

Segir í tilkynningunni að á árunum 2023-2025 sé ráðgert að samtals 600 milljónir renni af fjárlögum til stofnunar miðstöðvarinnar og til eflingar sjóða tónlistar til viðbótar við þau framlög sem renna nú þegar til tónlistar. 

Tónlistarmiðstöðin löngu tímabær

„Íslenskt tónlistarfólk er algjörlega frábært og íslensk tónlist hefur öll tækifæri til að geta orðið stöndugur atvinnuvegur sem skapar aukin verðmæti fyrir samfélagið. Stofnun tónlistarmiðstöðvar ásamt gerð tónlistarstefnu mun styrkja innviði greinarinnar enn frekar,“ er haft eftir Lilju Dögg Alfreðsdóttur menningarmálaráðherra.

„Við höfum lagt aukna áherslu á að styrkja og stuðla að viðspyrnu fyrir íslenskt tónlistarfólk eftir þau afleitu tvö ár sem heimsfaraldurinn bar í skauti sér. Tónlistarmiðstöð sem er löngu tímabær er stórt og mikilvægt skref sem við stígum fyrir bransann til framtíðar.“

Kemur fram að Tónlistarmiðstöðin muni sinna bæði fræðslu og stuðningi við tónlistarfólk og tónlistartengd fyrirtæki, styðja við uppbyggingu tónlistariðnaðarins, kynna íslenska tónlist og tónlistarfólk á erlendri grundu og vera nótnaveita fyrir íslensk tónverk.

Þá mun Tónlistarmiðstöðin styðja við uppbyggingu sprota og hlúa að ferli listafólks. Áhersla verður lögð á að tryggja fjölbreytni og grósku og að starfsumhverfið verði nútímalegt og hvetjandi fyrir íslenskt tónlistarlíf.

spot_img
spot_img
spot_img

Innlendar Fréttir