united-hefur-baett-sig

United hefur bætt sig

Ralf Rangnick, bráðabirgðastjóri Manchester United.

Ralf Rangnick, bráðabirgðastjóri Manchester United. AFP

Ralf Rangnick, bráðabirgðastjóri enska knattspyrnufélagsins Manchester United, segir liðið vera að bæta sig þrátt fyrir að hafa fallið úr enska bikarnum gegn B-deildarliðinu Middlesbrough síðastliðið föstudagskvöld.

Rangnick hefur stýrt liðinu í 11 leikjum. Í sex þeirra hafa leikirnir unnist, þrír hafa endað með jafntefli og tveir leikjanna hafa tapast.

„Ég er þess fullviss að við erum að spila á hærra stigi en við gerðum fyrir tveimur vikum. Bæði með boltann og án hans hefur liðið bætt sig,“ sagði Rangnick á blaðamannafundi í dag.

United hefur farið úr sjöunda sæti ensku úrvalsdeildarinnar og upp í það fjórða frá því Rangnick tók við þó bæði Arsenal og Tottenham Hotspur geti náð liðinu vinni þau leikina sem þau eiga til góða.

„Akkúrat núna erum við í fjórða sæti í deildinni og allir innan félagsins, ég meðtalinn, myndu vera ánægðir ef við endum tímabilið í fjórða sæti,“ bætti Rangnick við.

United heimsækir botnlið Burnley í ensku úrvalsdeildinni annað kvöld.

Jóhann Berg Guðmundsson mun ekki leika með Burnley eftir að hafa farið í skurðaðgerð í kjölfar þess að hann greindist með botnlangabólgu á dögunum.


Posted

in

,

by

Tags: