1 C
Grindavik
27. nóvember, 2020

Valur úr leik í Meistara­deild Evrópu eftir tap í víta­spyrnu­keppni

Skyldulesning

Valur er dottið úr leik í Meistaradeild kvenna í knattspyrnu eftir tap gegn Glasgow Celtic í vítaspyrnukeppni að Hlíðarenda í kvöld. Lokatölur 1-1 að loknum venjulegum leiktíma sem og framlengingu.

Valur og Glasgow City mættust að Hlíðarenda í dag. Undir var sæti í 32 liða úrslitum Meistaradeildar Evrópu og því mikið undir. Gestirnir frá Skotlandi eru ríkjandi Skotlandsmeistarar, hafa unnið alla fjóra leiki sína til þessa á leiktíðinni og fóru í 8-liða úrslit Meistaradeildarinnar í fyrra.

Fyrri hálfleikur leiksins fer ekki í neinar sögubækur en sjá mátti á leik beggja liða hvað var undir. Engar óþarfa áhættur teknar og leikmenn völdu öruggasta kostinn í öllum sínum aðgerðum. Bæði lið spiluðu svipaðan leikstíl og þó að gestirnir hafi verið ívið sterkari var staðan enn markalaus er fyrri hálfleik lauk.

Síðari hálfleikur var ekki gamall þegar gestirnir frá Skotlandi tóku forystuna. Markið kom eftir aukaspyrnu frá hægri kantinum sem send var inn á teig. Svo virtist sem um brot hefði verið að ræða en tveir leikmenn Vals féllu í teignum er boltinn var í loftinu. Hin hávaxna Jenna Clark skallaði boltann fyrir fætur Leanne Crichton sem skoraði með skoti af stuttu færi.

Staðan 0-1 og eftir það lögðust gestirnir til baka ásamt því að tefja við öll tilefni. Þegar rúmar tíu mínútur lifðu leiks fékk Valur horn eftir stórsókn þar sem bjargað var á línu eftir að Lee Alexander – markvörður gestanna – hljóp á Elínu Mettu Jensen og lá óvíg eftir.

Hallbera Guðný Gísladóttir tók hornspyrnu í kjölfarið sem sveif inn að marki. Alexander ætlaði að grípa boltann á nærsvæðinu en missti hann niður í legginn á Mist Edvardsdóttur og þaðan yfir línuna. Staðan orðin 1-1 og fleiri urðu mörkin ekki í venjulegum leiktíma. Því þurfti að framlengja á Hlíðarenda.

Þar voru Valskonur betri aðilinn. Elín Metta slapp ein í gegn en markvörður gestanna sá við henni. Þá átti Hlín Eiríks að fá vítaspyrnu undir lok framlengingar en dómari leiksins þorði ekki að dæma og staðan því enn 1-1 er flautað var til loka framlengingar og grípa þurfti til vítaspyrnukeppni.

Þar brást Valskonum bogalistin en þær Gunnhildur Yrsa, Hallbera Guðný og Arna Eiríksdóttir brenndu allar af vítaspyrnum. Sandra Sigurðardóttir varði tvívegis í markinu en að dugði ekki til.

Glasgow því áfram í 32-liða úrslitin og Valur situr eftir með sárt ennið.

Innlendar Fréttir