Það gengur lítið upp hjá Mikel Arteta og lærisveinum hans í Arsenal þessa dagana.
AFP
Mikel Arteta, knattspyrnustjóri Arsenal, er öruggur í starfi þrátt fyrir dapurt gengi í upphafi tímabilsins en það er Football.London sem greinir frá þessu.
Arsenal tapaði 1:0 á heimavelli fyrir Burnley í ensku úrvalsdeildinni í gærdag og eru nokkrir stuðningsmenn Arsenal farnir að kalla eftir því að Arteta verði rekinn.
Spánverjinn tók við stjórnartaumunum hjá Arsenal í desember 2019 og varð liðið enskur bikarmeistari undir stjórn hans á síðustu leiktíð.
Arsenal hefur hins vegar aðeins unnið fjóra leiki í ensku úrvalsdeildinni á tímabilinu og er með 13 stig í fimmtánda sæti deildarinnar, 5 stigum frá fallsæti eftir fyrstu tólf umferðirnar.
Arteta skrifaði undir þriggja og hálfs árs samning við félagið og greinir Football.London frá því að Arteta verði ekki rekinn fyrr en í fyrsta lagi eftir tímabilið.
