4 C
Grindavik
7. mars, 2021

Víðir er hressari í dag en hann var í gær – Segist sjá jákvæð teikn í tölum dagsins

Skyldulesning

Rögnvaldur Ólafsson, aðstoðaryfirlögregluþjónn hjá almannavarnadeild ríkislögreglustjóra, segist sjá jákvæð teikn á lofti í smittölum gærdagsins sem birtar voru nú í morgun. „Þetta eru býsna góðar fréttir. Rúmlega 80% af þeim sem greindust eru í sóttkví sem er náttúrulega jákvætt. Þó er auðvitað ekki gott að sjá hvað margir eru smitaðir,“ segir hann. „Við þurfum bara að sjá hvað næstu dagar bjóða okkur. Vonandi heldur þetta áfram á þessari leið með færri smitum.“

Rögnvaldur segir hið háa hlutfall smita sem greindust í sóttkví gæti verið vísbending um að við séum aðeins að ná utan um þetta.

Í fréttum vikunnar kom fram að mikill fjöldi smita utan sóttkvíar mætti rekja til lítilla hópsýkinga „hér og þar í samfélaginu.“ Hefur DV til dæmis heimildir fyrir því að eitt slíkt hópsmit hafi átt sér stað í 11 manna afmælisveislu ungra stelpna í úthverfum borgarinnar. Greindust 9 gestir afmælisveislunnar með Covid-19 í kjölfar veislunnar.

Aðspurður hvort lögreglan hyggst beita sektum eða öðrum viðurlögum í kjölfar slíkra brota á sóttvarnareglum segir Rögnvaldur aðalatriðið vera smitrakninguna. „Við höfum verið að leggja áherslu á að fólk segi okkur satt og rétt frá og ef við færum að sekta fólk byggt á upplýsingum sem fram koma við smitrakningu þá gæti það leitt til þess að fólk fari jafnvel að fegra sinn hlut og að upplýsingar berist okkur hægar eða síður,“ segir hann.

„Allar upplýsingar sem fara inn í smitrakningateymið eru bara þar, við erum ekki að nota þær í annað. Sú vinna sem þar fer fram snýst 100% um að rekja smitin, stöðva smitleiðir og koma í veg fyrir útbreiðslu Covid-19,“ útskýrir Rögnvaldur. „Þar erum við ekki að eltast við einhver ætluð lögbrot.“ Rögnvaldur segir smitrakningu almennt ganga vel en að mannlegt sé að fólk reyni að fegra sinn hlut og gangast síður við mistökum. Þannig má skilja á orðum Rögnvalds að mikilvægt sé að aðskilja löggæslu og smitrakningu, þó það séu vissulega lögreglumenn í smitrakningarteyminu.

Víðir betri í dag en hann var í gær

Rögnvaldur segist hafa heyrt í kollega sínum Víði Reynissyni sem greindist nýverið með Covid-19 í dag. Segir hann örlítinn dagamun vera á Víði og að hann sé betri í dag en hann var í gær. Sagt var frá því í gær að Víðir hefði verið merktur gulur af Covid-19 göngudeild Landspítalans og verið kallaður inn á spítalann til rannsókna.

Víðir mun hafa fengið vökva í æð á spítalanum og hressist hann töluvert við það. „Hann finnst hann vera eitthvað hressari í núna en hann var í gær,“ sagði Rögnvaldur um Víði. Sýkingin virðist hafa stungið sér niður í lungun á Víði eins og við er að búast af Covid-19 sjúkdómnum. Því fylgi gjarnan lægri súrefnismettun og mikill hósti.

„Víðir ber sig vel og ekkert að barma sér,“ segir Vestfirðingurinn Rögnvaldur að lokum um vin sinn frá Vestmannaeyjum.

Innlendar Fréttir