7.3 C
Grindavik
21. september, 2021

Viðræður við kandídata að hefjast

Skyldulesning

Guðni Bergsson, formaður KSÍ, mun í umboði stjórnar sambandsins hefja viðræður við þá sem til greina koma sem þjálfarar A-landsliðs karla í fótbolta.

„Við erum byrjaðir að ræða málin . Undirbúningsvinna hefur farið fram og ferlið er hafið og mun ég ræða við þá aðila á næstunni sem við teljum henta í starfið,“ segir Guðni í samtali við Vísi. Æskilegt sé að nýr þjálfari taki við fyrir jól.

Viðræður eru rétt að byrja og formaðurinn vill að svo stöddu ekkert gefa uppi um við hvern eða hverja verði rætt.

Engin hindrun fólgin í starfi Arnars

Arnar Þór Viðarsson, sem stýrði U21-landsliði Íslands upp úr undankeppni EM á dögunum, hefur helst verið orðaður við starfið og lýst yfir áhuga á að taka við því. Guðni vill ekkert segja um hvort rætt verði við Arnar um að taka við A-landsliðinu, en aðspurður hvort Arnar geti yfirhöfuð verið í þjálfarateymi A-landsliðsins samhliða starfi sínu sem yfirmaður knattspyrnumála hjá KSÍ svarar Guðni:

„Við höfum ekki tekið afstöðu til þess enn en ég sé það svo sem ekki sem einhverja hindrun – að við séum með starfsmann hér innanborðs sem sinni fleiri störfum eins og Arnar hefur verið að gera með U21-landsliðinu.“

Segir KSÍ hafa efni á erlendum þjálfara

Guðni segist hafa fundið fyrir áhuga á starfinu, bæði hérlendis og erlendis, en hefur KSÍ efni á því að ráða erlendan þjálfara með alþjóðlega reynslu, í núverandi árferði?

Erik Hamrén lýsti því yfir fyrir þremur vikum að hann myndi hætta með landsliðið.vísir/vilhelm

„Já, en það veltur auðvitað á því um hvað er verið að ræða. Hluti af því sem þarf að hafa til hliðsjónar er auðvitað kostnaðurinn, hvort sem um erlendan eða íslenskan þjálfara er að ræða. Ég held að almennt séð séu lægri laun í boði í þessum geira en til að mynda fyrir ári síðan, miðað fréttir og ástandið. Við getum ráðið erlendan þjálfara en myndum auðvitað bara gera slíkt á þeim forsendum sem við ráðum við og teljum eðlilegt.“

Æskilegt að nýr þjálfari taki við fyrir jól

Næsta verkefni landsliðsins er í mars þegar undankeppni HM í Katar hefst með 2-3 útileikjum. Dregið verður í undankeppnina á mánudaginn eftir viku en verður Ísland þá komið með nýjan landsliðsþjálfara?

„Ég er nú ekki viss um að við náum því á þessari viku en við viljum auðvitað vera búin að finna út úr þessu fyrir jólin, ég held að það sé æskilegt.“

Óljóst hvort Hamrén hefði fengið að halda áfram

Erik Hamrén tilkynnti það eftir að EM-draumurinn fjaraði út í Búdapest um miðjan nóvember að hann yrði ekki áfram landsliðsþjálfari, eftir tveggja ára starf fyrir KSÍ. Við tók leit að arftakanum hjá stjórn KSÍ en Guðni segir Hamrén ekki hafa verið búinn að gefa til kynna að hann myndi hætta ef leikurinn við Ungverjaland, eða Rúmeníu, tapaðist.

Ísland tapaði með sárgrætilegum hætti gegn Ungverjalandi í úrslitaleik um sæti á EM. Erik Hamrén tilkynnti í kjölfar leiksins að hann myndi hætta sem landsliðsþjálfari.Getty/Laszlo Szirtesi

„Þetta kom bara í ljós fljótlega eftir Ungverjaleikinn. Það voru bara allir á því að koma sér á lokamótið og það var það sem var á dagskránni. Annað hafði ekki verið rætt,“ segir Guðni og vill ekkert gefa uppi um hvort hann hefði viljað að Hamrén héldi áfram:

„Það hefur ekkert upp á sig að ræða það enda var aldrei farið yfir það.“

Ekki búið að festa niður landsleiki í janúar

Nýr þjálfari A-landsliðs karla gæti þreytt frumraun sína í vináttulandsleikjum í janúar en kórónuveirufaraldurinn veldur óvissu um það. Guðni segir ekkert frágengið varðandi slíka leiki, hvorki fyrir karla- né kvennalandsliðið:

„Við erum að athuga möguleikana en það er ekkert afráðið með það. Þetta er ekki bara í okkar valdi og veltur á aðstæðum þegar nær dregur.“

spot_img
spot_img
spot_img

Innlendar Fréttir