8 C
Grindavik
15. apríl, 2021

Vika liðin frá upphafi eldgoss í Geldingadal – Sjáðu nýjasta myndbandið af gosinu

Skyldulesning

Rétt vika er nú liðin frá því að eldgos hófst á Reykjanesskaga, í Geldingadölum nánar tiltekið, rétt austan við Grindavíkurveg og norðan við Suðurstrandarveg.

Þúsundir hafa þegar lagt leið sína að gosinu til að berja það eigin augum og er óhætt að segja að um mikið sjónarspil sé að ræða. Þegar blaðamaður gerði sér ferð að gosinu á sunnudag síðastliðinn voru þar þúsundir á ferð og bílum lagt á víð og dreif um Grindavíkurbæ og Grindavíkurveg. Næstu dagar einkenndust svo af talsverðri óreiðu sem viðbragðsaðilar hafa síðan keppst við að koma böndum á. Ein björgunarsveitin orðaði svo að „allt hefði farið í skrúfuna,“ þegar veður versnaði og leit hófst að týndum göngugörpum.

Gönguleiðir, tvær hið minnsta, hafa síðan verið stikaðar að gosinu og er unnið að því að skipuleggja bílastæði og samgöngukerfi fyrir svæðið, en ljóst er að það ræður ekki á nokkurn hátt við átroðninginn sem nú á sér stað á hverjum degi. Ljóst er að björgunarsveitir hafa unnið mikið þrekvirki undanfarna viku.

Vísindamenn hafa þá jafnframt sagt að meiri líkur en minni séu á því að gosið muni standa lengur en fyrst var talið, hið minnsta ekki í örfáa daga eins og fyrstu spár gerðu ráð fyrir. Rennslið úr gosinu er nú talið vera rétt rúmir fimm rúmmetrar á sekúndu, eða á við meðalflæði Elliðaár í Reykjavík. Miðað við það flæði og útreikninga verkfræðinga mun dalurinn fyllast af hrauni á um það bil tveim vikum og eftir það flæða yfir í nærliggjandi dali. Talað hefur verið um Meradali og Nátthaga í því samhengi, en það hefur einmitt verið aðkomuleið viðbragðsaðila og fjölmiðla að svæðinu hingað til.

Afleit veðurspá er fyrir helgina, sem veldur viðbragðsaðilum áhyggjum. Ekki hefur verið gefið neitt út um hvort svæðinu verði lokað, en svo gæti vissulega farið að landsmenn þurfi að láta sér nægja ljósmyndir af gosinu næstu tvo daga. Það er því heppilegt að enginn skortur sé á þeim á samfélagsmiðlum um þessar mundir.

Þá hafa myndbönd drónamanna vakið athygli í vikunni og kannski einna helst myndband Björns Steinbekk, en svo virtist sem Björn hefði flogið drónanum í gegnum brennandi heitar hraunsletturnar er þær þeyttust upp um gíginn. Nú hefur annað slíkt myndband skotið upp kollinum. Það er úr smiðju Iceland Aerials og má sjá hér að neðan. Fleiri myndbönd og myndir má sjá á Instagram síðu þeirra hér.

Innlendar Fréttir