10.3 C
Grindavik
29. september, 2022

Vill sjá þjóðarleikvang í Kaplakrika – ,,Hér er ekki fyrir neinum Wembley að skipta“

Skyldulesning

Í dag birtist pistill á vísir.is eftir Árna Stefán Guðjónsson, varabæjarfulltrúa Viðreisnar í Hafnarfirði, sem ber nafnið Þjóðarleikvang í Kaplakrika.

Þar veltir hann því upp hvar landslið Íslands í knattspyrnu eigi að leika leiki sína á meðan að byggingu nýs þjóðarleikvangs í knattspyrnu stendur yfir í Laugardalnum.

,,Knattspyrnuáhugafólk þekkir þetta vel frá London þar sem Tottenham Hotspur spilaði heimaleiki sína um tíma á Wembley á meðan nýr leikvangur var byggður. Vandi okkar Íslendinga er sá að hér er ekki fyrir neinum Wembley að skipta. Ef við rennum snöggvast í gegnum þarfagreiningu fyrir slíkan völl þá þarf hann að hafa grasvöll, yfirbyggða stúku, góða tengda aðstöðu og möguleika á því að koma því sem næst 10.000 manns á völlinn. Með þetta í huga er svarið augljóst: Kaplakriki,“ skrifar Árni Stefán í pistli á vísir.is.

Árni segir að í Kaplakrika væri með einföldum hætti hægt að byggja yfir norðurstúkuna og smíða tengibyggingu milli norður- og suðurstúku með fleiri sætum þannig að hægt væri að taka á móti allt að 10.000 gestum. Í tengibygginguna væri þá einnig hægt að setja stoðrými eins og fjölmiðlaaðstöðu sem yrði svo umbreytt í einhverja íþróttatengda þjónustu í tímans rás.

Verkefnið myndi þá einnig kalla á að yfirborð vallarins yrði fært upp í blendingsgras (hybrid) með undirhita sambærilegt við velli á norður-Englandi og loks þyrfti að setja upp flóðljós til þess að gera völlinn leikhæfan á leikdögum sem eru yfir vetrartímann.

,,Þessar litlu og tiltölulega einföldu breytingar kosta líklegast innan við 10% af því sem nýr Laugardalsvöllur kostar og eru einfaldlega hluti af því verkefni. Þegar uppbyggingu á Laugardalsvelli er lokið og landsleikir færast þangað verður hægt að nýta hinn nýja Kaplakrika í landsleiki yngri landsliða, evrópuleiki og margt fleira,“ skrifar Árni Stefán, varabæjarfulltrúi Viðresinar í Hafnarfirði.

Árni segir það liggja fyrir að þetta þarf að vera klárt þegar niðurrif hefst á Laugardalsvelli og því ekki seinna vænna að hefja undirbúning en núna. Hann vill að Hafnarfjarðarbær sendi án tafar inn erindi til íþróttamálaráðherra þar sem að Kaplakriki yrði boðinn fram sem staðgengill Laugardalsvallar á meðan að uppbyggingu Laugardalsvallar stendur ,,og óska eftir því að stjórnvöld styðji við þessa umbreytingu vallarins með sambærilegum hætti og er fyrirhugaður í Reykjavík.“

spot_img
spot_img
spot_img

Innlendar Fréttir