0 C
Grindavik
30. nóvember, 2020

Warner staðfestir áætlanir um Wonder Woman 1984

Skyldulesning


Heiðar Sumarliðason skrifar

Warner Bros. bauð kórónuveirunni byrginn með því að gefa Tenet út í kvikmyndahús um allan heim sl. sumar, en hafði ekki erindi sem erfiði þar sem aðsóknin olli töluverðum vonbrigðum. Kvikmyndaverið er þó ekki af baki dottið, líkt og margir aðrir dreifingaraðilar kvikmynda, og prófar nýja leið með Wonder Woman 1984. Fyrir fram ákveðnum kvikmyndahúsaútgáfudegi, 25. desember, er haldið til streitu, en myndin mun hins vegar einnig koma út á HBO-Max í Bandaríkjunum sama dag. Ekki þarf að greiða aukalega fyrir aðgang að myndinni og geta allir áskrifendur streymisveitunnar því séð hana. Þetta er ólíkt því þegar Disney setti Mulan á Disney+, en hún var ekki innifalin í mánaðargjaldi veitunnar og kostaði aðgangurinn heila 30 dollara.

Eins og sakir standa er HBO-Max einungis fáanlegt í Bandaríkjunum, því geta Íslendingar ekki séð Wonder Woman 1984 í sjónvarpinu sínu. Hins vegar þýðir þessi nýja útgáfuleið Warner Bros. að engin seinkun verður á kvikmyndahúsútgáfu myndarinnar, líkt og er orðið svo algengt með stórmyndir í dag. Því geta íslenskir áhorfendur séð Wonder Woman sveifla hinni svokölluðu „svipu sannleikans“ í Sambíóunum frá og með öðrum degi jóla.

Friður í samskiptum við kvikmyndahúsin

Warner Media, sem er bæði eigandi Warner Bros. og HBO-Max, sá sér leik á borði og vonast til að auka áskrifendafjölda Max-veitunnar töluvert með þessari dreifingarleið, og um leið losa um stíflu óútgefinna titla, sem farin er að myndast. 

Disney+ hefur einnig horfið frá Mulan-útgáfuforminu, að láta áskrifendur borga aukalega fyrir aðgang að nýjum kvikmyndum, og munu allir áskrifendur þeirra hafa aðgang að nýjustu Pixar-myndinni Soul, frá og með jóladegi.

Samskipti kvikmyndahúsakeðja í Bandaríkjunum og kvikmyndaveranna hafa að undanförnu einkennst af spennu vegna Covid-19-hamla, en fulltrúar Universal og AMC-keðjunnar deildu í kjölfar útgáfu á Trolls: World Tour, sem fór fór fram hjá kvikmyndahúsum og beint á VOD í Bandaríkjunum sl. vor. AMC, sem er stærsta kvikmyndahúsakeðja Bandaríkjanna, setti Universal stólinn fyrir dyrnar í kjölfarið og ætluðu að hætta að sýna myndir þeirra. Málið leystist þó farsællega í sumar þegar AMC var lofað að fá allar Universal-myndir í a.m.k. þrjár vikur áður en þær kæmu út á VOD.

Fólk í kvikmyndaiðnaðinum og fjölmiðlum veltir nú fyrir sér áhrifum þessa á framtíð kvikmyndahúsa en forstjóri Warner Media, Jason Kilar, segir þó í tilkynningu, að Warner hafi enn fulla trú á að kvikmyndahúsin nái sér á strik eftir að bóluefni er komið í almenna umferð.

Innlendar Fréttir