Að hvalur springi í loft upp er ekki algengt og enn óalgengara að það náist á filmu. Það getur verið varasamt að vera nálægt þegar slíkt gerist.
Gríski miðillinn Greek Reporter birti í vikunni myndband af slíku atviki sem átti sér stað í Tomales flóa í Kaliforníu í Bandaríkjunum. Fólk um borð í skipi sá þanið hvalshræ fljóta á yfirborðinu og loks springa með miklum látum.
Þegar hvalur deyr byrjar hann að rotna að innan og bakteríur búa til ýmsar gastegundir svo sem metan, nitur og koldíoxið. Yfirleitt kemst gasið út um líkamsop svo sem munninn eða endaþarminn. Annars byggist það upp og kviðurinn þenst eins og blaðra.
Í annað skipti sem náðist myndband af hval springa var þegar líffræðingur að nafni Bjarni Mikkelsen var að skera rekinn búrhval í Færeyjum. Litlu mátti muna að illa færi í það skiptið eins og sést í myndbandi frá færeyska ríkissjónvarpinu.
Stundum springa dauðir hvalir hins vegar ekki af sjálfsdáðum heldur af mannavöldum eins og sést í þriðja myndbandinu, sem tekið var upp í Oregon fylki í Bandaríkjunum árið 1970. En þá var tekið til þess ráðs að sprengja rekið hvalshræ.
